'Madem em ê di dewletê de cih bigirin wê demê nasnameya Kurdan qebûl bikin’ 2025-08-31 14:31:16 EDENE - Wekîlê DEM Partiyê Omer Ocalan, got: “Madem em ê bi entegrasyoneke demokratîk di dewletê de cih bigirin, wê demê ziman, çand, nasname û siyaseta Kurdan qebûl bikin.”  Komeleya Alîkarî û Piştevaniya bi Malbatên Xizmên Xwe Winda Kirin re ya Akdenîzê (AKKAY-DER), li Eywana Şîrîn Muzîkholê ya li navçeya Seyhanê ya Edeneyê 1’emîn Kongreya Asayî li dar xist. Nûnerên partiyên siyasî, rêxistinên jinan û rêxistinên civaka sivîl jî tev li bûn. Li eywanê posterên Rêberê Gelê Kurd Abdullah Ocalan û pankarta “Em di jiyana sosyalîst de israr dikn, bi Rêbertiya azad xwe birêxistin dikin” hate daliqandin. Kongre, bi deqeyek rêzgirtinê dest pê kir. Dema dîroka berxwedana 50 salên dawî ya li Kurdistanê dihat vegotin, girseyê gelek caran dirûşmên “Bijî Serok Apo” û “Şehîd namirin” berz kir.    Wekîlê DEM Partiyê yê Rihayê Omer Ocalan di kongreyê de axivî û bal kişand ser pêvajoyê. Ocalan, got: “Em ê bi hev re vê pêvajoyê birêve bibin. Ev pêvajoya Rêbertî birêve dibe ne pêvajoyeke taktîkî ye. Ji bo gelê me gavekî stratejîk e. Rêbertiyê ji bo aştî û çareseriya demokratîk gavekî mezin avêt. 27 sal in ji bo çareseriyê li muxatabekî digere. Dewlet û hikûmetê got ku ji bo çareseriyê amade ne. Heke dewleta Tirkiyeyê amade be, wê demê em jî, gelê me jî Rêbertiya me jî amade ye. Em ê di rêya birêz Abdullah Ocalan de bin. Madem em ê bi entegrasyoneke demokratîk di nava dewletê de cih bigirin, wê demê çand, ziman, nasname û siyaseta Kurdan jî divê qebûl bikin.”    BANGA XWEDÎDERKETINA LI PÊVAJOYÊ     Ocalan, bal kişand ser yekitî û hevgirtina gelê Kurd û got: “Gelê Kurd xwe ji nebûnê afirand. Bi gel û şehîdên xwe hebûna xwe ava kir. Bi Rêbertiya xwe hebûna xwe ava kir. Bi hezaran bedel da. Heta ku hebûna me tê qebûlkirin em ê têbikoşin û vê pêvajoyê em ê bi ser bixin. Divê dewlet zelal be. Ez banga xwedîderketina li paradîgmaya çareseriyê ya birêz Abdullah Ocalan li her kesî dikilm. Em dixwazin modeleke jiyanê yê nû bixin meriyetê. Em banga xwedîderktina li pêvajo û têkoşînê li her kesî dikin.”    Di kongreyê de Abîdîn Eye û Rahîme Agaç weke hevserokên nû hatin hilbijartin.