ÎZMÎR - Dayika Denîz Poyraz, Fehîme Poyraz beriya danişînê nêrînên xwe parve kir û got: “Ev doz tenê ne doza min e, doza hemû gelê kurd e.”
Bi sedan kes ji bo danişîna ewil a doza Denîz Poyraz hatin ber Edliyeya Îzmîrê. Danişîn wê li eywana konferasnê ya edliyê were lidarxistin. Ji ber ewyan ne amade bû danişînê saet di dehan de dest pê nekir.
Dayika Denîz Poyraz, Fehîme Poyraz û bi sedan kes û nûnerên partiyên siyasî û rêxistinên sivîl beşdarî danişînê bûne û li bendê ne danişîn dest pê bike. Fehîme Poyraz ji ber qelebalixiyê hestiyar bû û ji sekna xwe ya serbilind tavîz nade.
'MIN BI TENÊ NEHIŞTIN’
Fehîme Poyraz beriya danişînê hestên xwe parve kir û wiha got: “Kesî me bi tenê nehişt. Ez spasiya hemû beşdaran û piştevanan dikim. Ev girse min kelecanî kir. Ev doz tenê ne doza min e, doza hemû gelê Kurdistanê ye û doza dostên gelê kurd e. Mala wan ava me bi tenê nehiştin. Em dizanin ku kujerê Denîzê ne bi tenê vê êrişê kiriye, yên destekê dane wî hene û ew ji kujer bêtir bi bandor in. Divê tenê ne kujer yên ku rê danîne ber wî jî werin cezakirin.”
DAYIKÊN AŞTIYÊ HÊZ DANE WÊ
Poyraz destnîşan kir ku beşdarî û piştevaniya Dayikên Aştiyê yên ji gelek bajaran hatine hêz dane wê û divê êdî kes nemire û aştî pêk were.