STENBOL - Parêzer Zozan Vargûn diyar kir ku girtiya nexweş Gulbahar Kiskaç ji ber paşxaneya xwe ya Romanî rastî cihêkariyê tê û rewşa wê ya tenduristiyê giran e. 

 

Şaxa Stenbolê ya Komeleya Mafên Mirovan (ÎHD) ji bo balê bikşînin ser pirsgirêkên tenduristiyê yên Gulbahar Kıskaç (60) a ku li Girtîgeha Tîpa L a Hejmar 1 a Sakaryayê tê ragirtin û cudakariya ku lê tê kirin hişyar bike li avahiya komeleyê daxuyanî da. Di daxuyaniyê de hat xwestin ku Gulbahar Kiskaç serbest bê berdan.

 

GELEK NEXWEŞIYÊN WÊ HENE 

 

Parêzera Gulbahar Kiskaç Zozan Vargûn diyar kir ku muwekîla wê bi nexweşiyên kronîk ên giran re rû bi rû ye. Zozan Vargûn ragihand ku Gulbahar Kiskaç ji ber nasnameya romanî li girtîgehê rastî cihêkariyê hatiye û şert û mercên girtîgehê hem di warê fîzîkî hem jî derûnî de bi awayekî neyînî bandorê lê dike û wiha got: "Dûrmayîna ji malbata xwe, tecrîdkirina wê ya civakî hê kûrtir dike. Li gorî van hemû şert û mercan, rejîma înfazê li dijî pîvanên mafên mirovan e."

 

Zozan Vargûn got, " Rewşa tenduristiyê ya Kıskaç giran e. Nexweşiya dil, tansiyon, şekir û romatîzmayê pê re heye. Di lingên wê de edema girîng heye û di laşê wê de birînên wê yên mezin hene ku baş nabin. Nabe ku ev pirsgirêkên tenduristiyê di nava şert û mercên heyî yên girtîgehê de baş û bênavber bên tedawîkirin. Di heman demê de muwekîlê min jî ji ber şert û mercên giran ên ku pê re rû bi rû ye şikestineke giran a psîkolojîk dijî, dermanên psîkiyatriyê bi kar tîne û ji ber tenêtî û zexta li girtîgehê rewşa wê ya derûnî bêhtir nebaş dibe.”

 

'JI BER NASNAMEYA XWE YA ETNÎKÎ MÛAMELEYA NEBAŞ TÊ KIRIN' 

 

Zozan Vargûn da zanîn ku muwekîla wê ji ber nasnameya Romanî li girtîgehê rastî muameleya nebaş tê û wiha got: "Ev rewş li dijî prensîba wekheviyê ya di Destûra Bingehîn de û qedexekirina cihêkariyê ye ku bi xala 14’emîn a Peymana Mafên Mirovan a Ewropayê hatiye birêvebirin. Divê ev pêkanînên li girtîgehê weke parçeyek ji pirsgirêkên sîstematîk ên girtiyên Romanî rû bi rû ne, bên dîtin."

 

'TÊKÎLIYÊN BI MALBATA WÎ RE TÊN QUTKIRIN' 

 

Zozan Vargûn da xuyakirin ku malbata Gulbahar Kiskaç li Stenbolê dijî û piştî hevserê wê jiyana xwe ji dest da, girêdana bi zarokên wê re hîn girîngtir bûye. Vargûn diyar kir ku ji ber muwekîla wê li Sakaryayê girtî ye, têkiliya fîzîkî ya bi zarokên wê re hema bêje ne pêkan e. Zozan Vargûn jî bal kişand ku serlêdanên ji bo veguhestina Gulbahar Kıskaç a Saziya Cezayê Nimreya Jinan a Bakirkoyê bi hinceta ku 'sazî destûra veguhastinê nade' hatiye redkirin. 

 

JI BO HER KESÎ DAXWAZA EDALETÊ 

 

Zozan Vargûn xwest Gulbahar Kiskaç sewqî Girtîgeha Bakirkoyê bê kirin, ji bo têkiliyên xwe yên bi malbata xwe re bên dewamkirin û cezayê wê yê li ser rewşa tenduristiyê bê taloqkirin. Zozan Vargûn wiha axivî: "Ev yek ne tenê daxwazeke takekesî ye, ji bo bidawîkirina pêkanînên cihêkariyê yên li hemberî girtiyên Roman divê gaveke binyadî bê avêtin. Em sîstemeke edaletê ya ji bo her kesî derbasdar e.”